funny video168: November 2017

Wednesday, November 22, 2017

កម្ពុជានឹងមានរោងចក្រផលិតគ្រឿងបង្គុំគ្រឿងចក្រនៅក្នុងខេត្តស្វាយរៀងឆាប់ៗនេះ

កម្ពុជានឹងមានរោងចក្រផលិតគ្រឿងបង្គុំគ្រឿងចក្រនៅក្នុងខេត្តស្វាយរៀងឆាប់ៗនេះ

ក្រុមប្រឹក្សាអភិវឌ្ឍន៍កម្ពុជា បានសម្រេចចេញ វិញ្ញាបនប័ត្រចុះបញ្ជីជាស្ថាពរដល់ក្រុមហ៊ុនចំនួនបីដែលមានទំហំទឹកប្រាក់វិនិយោគសរុបចំនួនប្រមាណជាង ៧,៦លានដុល្លារអាមេរិក ដើម្បីស្ថាបនារោងចក្រផលិតគ្រឿងបង្គុំគ្រឿងចក្រនៅក្នុងខេត្តស្វាយរៀង។ នេះបើតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា នៅរសៀលថ្ងៃទី២០ ខែវិច្ឆិកា ឆ្នាំ២០១៧ ។ក្រុមហ៊ុនទីមួយឈ្មោះ YNX Manufacturing Technologies Co., Ltd.ដែលមានគម្រោងបង្កើតរោងចក្រផលិតគ្រឿងបង្គុំគ្រឿងចក្រ សម្ភារៈលើកដាក់ទំនិញ ម៉ាស៊ីនខ្យល់ និងម៉ាស៊ីនក្រឡឹងគ្រប់ប្រភេទ ។ គម្រោងនេះមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសសានដុង សាន់សែល ខេត្តស្វាយរៀង ដែលមានទុនវិនិយោគចំនួន ៥លានដុល្លារអាមេរិក និងអាចបង្កើតការងារបានចំនួន ១២៥នាក់ ។ ក្រុមហ៊ុនទីពីរឈ្មោះ Jianpan (Cambodia) Matelwork Co., Ltd. ដែលមានគម្រោងបង្កើតរោងចក្រផលិតស្មាអាវ។គម្រោងនេះមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ ដែលមានមានទុនវិនិយោគចំនួន ៥០០ពាន់ដុល្លារអាមេរិក និងអាចបង្កើតការងារបានចំនួន ៥២៨នាក់ ។ ក្រុមហ៊ុនចុងក្រោយគឺ ក្រុមហ៊ុន Wan Jia Hao Knitting Co., Ltd. មានគម្រោងបង្កើតរោងចក្រកាត់ដេរសម្លៀកបំពាក់ ។ គម្រោងនេះមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសតាយសេង បាវិត ខេត្តស្វាយរៀង ដែលមានទុនវិនិយោគចំនួន ២,១៤១ លានដុល្លារអាមេរិក និងអាចបង្កើតការងារបានចំនួន៨៥នាក់៕ប្រភព៖everyday news

លីគថៃរកឃើញកីឡាករលក់គ្រាប់បាល់ អាចពិន័យ១៥ម៉ឺនដុល្លារ ឬជាប់គុក៥ឆ្នាំ

សហព័ន្ធកីឡាបាល់ទាត់ថៃ បានរកឃើញកីឡាករ៥នាក់ និងអាជ្ញាកណ្ដាល២នាក់ ដែលបានរៀបចំដើម្បីកំណត់លទ្ធផលទុកមុនការប្រកួត។កាលពីពេលកន្លងទៅនេះ សហព័ន្ធបាល់ទាត់ថៃ បានសហការគ្នាជាមួយខាងអាជ្ញាធរ ដើម្បីរៀបចំស៊ើបអង្កេតករណីមិនប្រក្រតីកើតឡើងនៅលីគបាល់ទាត់។ ជារួមពួកគេបានកំណត់ជនសង្ស័យ១២នាក់ ដើម្បីស៊ើបសួរ ហើយជាលទ្ធផលឃាត់ខ្លួនបានកីឡាករ៥នាក់ និងអាជ្ញាកណ្ដាល២នាក់។កីឡាករ៥នាក់ដែលគេរកឃើញនោះ គឺមកពីខាងក្លឹបទ័ពជើងទឹក Navy ៤នាក់ និងអ្នកចាំទីមកពីក្លឹប Nakhon Ratchasima FC ម្នាក់។ ចំណែក នាយកក្លឹប Sisaket FC ក៏ត្រូវបានរកឃើញថា បានរួមចំណែកក្នុងការរៀបចំលទ្ធផលនេះផងដែរ។ ការរៀបចំលទ្ធផល ត្រូវបានរកឃើញក្នុងការប្រកួតចំនួន៤ នៅចុងរដូវកាលនៃលីគកំពូលថៃ។អ្នកដែលជាប់ពាក់ព័ន្ធទាំងអស់ អាចត្រូវពិន័យជាប្រាក់រហូតដល់ ៥០ម៉ឺនបាត (ជាង ១៥ម៉ឺនដុល្លារអាមេរិក) ឬ ដាក់ពន្ធនាគាររហូតដល់ ៥ឆ្នាំ។ ដោយឡែក ក្លឹប Nakhon Ratchasima បានសម្រេចបញ្ចប់កុងត្រារបស់អ្នកចាំទីខ្លួនភ្លាមៗ ក្រោយពីទទួលបានព័ត៌មានខាងលើ ហើយអះអាងថា នឹងចាត់វិធានការតាមផ្លូវច្បាប់ចំពោះទង្វើរបស់អ្នកចាំទីរូបនេះ៕ប្រភព៖ Bangkokpost

Tuesday, November 21, 2017

ឈុតគ្រឿងអលង្ការមាស សម័យអង្គរ នឹងត្រូវនាំពីអង់គ្លេសមកកម្ពុជាវិញ

ឈុតគ្រឿងអលង្ការមាសសម័យអង្គរនឹងត្រូវនាំយកពីប្រទេសអង់គ្លេសមកកាន់កម្ពុជាវិញនាពេលឆាប់ៗខាងមុខនេះ។ នេះបើតាមប្រសាសន៍លោកប្រាក់ សុណ្ណារ៉ា អគ្គនាយកនៃអគ្គនាយកដ្ឋានបេតិកភណ្ឌនៃក្រសួងវប្បធម៌ និងវិចិត្រសិល្បៈ ។លោកឲ្យដឹងទៀតថា កម្ពុជានឹងដឹកនាំគណៈប្រតិភូទៅទទួលយកមកវិញនូវឈុត គ្រឿងអលង្ការមាសសម្រាប់លម្អរូប ចម្លាក់នាសម័យអង្គរ នៅទីក្រុងទ្បុងដ៍ ប្រទេសអង់គ្លេសនៅខែក្រោយនេះ បន្ទាប់ពីភ្នាក់ងារលក់វត្ថុបូរាណ នៅចក្រភពអង់គ្លេសឈ្មោះ Johnathan Tucker Antonio Tozer Asian Art ស្ម័គ្រចិត្ដប្រគល់មកកម្ពុជាវិញកាលពីខែមេសា ឆ្នាំ២០១៧នេះ។

លោកប្រាក់ សុណ្ណារ៉ា បន្ថែមថា ការទាមទារឈុតគ្រឿងអលង្ការមាសនេះមកវិញត្រូវបានធ្វើឡើង បន្ទាប់ពី កម្ពុជាទទួលព័ត៌មានថាភ្នាក់ងារលក់វត្ថុបូរាណ Johnathan Tucker Antonio Tozer Asian Art បានប្រកាស ដាក់ តាំង លក់វត្ថុបូរាណឥណ្ឌា និងអាស៊ីអាគ្នេយ៍ នៅស្នាក់ការរបស់ខ្លួន នាទីក្រុងទ្បុងដ៍ ចាប់ពីថ្ងៃទី៣ ដល់ទី២៥ ខែវិច្ឆិកា ឆ្នាំ២០១៦។ គណៈប្រតិភូក្រសួងនឹងទៅយកឈុតគ្រឿងអលង្កការមាសពីចក្រភពអង់គ្លេស ហើយពិធីដង្ហែដ៏ធំមួយ ក៏នឹងត្រូវបានរៀបចំផងដែរ នៅពេលគណៈប្រតិភូត្រទ្បប់មកវិញ។លោកបានឱ្យដឹងទៀត ថា មន្រ្ដីក្រសួងវប្បធម៌នឹងរក្សាទុកឈុតគ្រឿងអលង្កការមាសនៅកន្លែងមានសុវត្ថិភាព ដោយ រង់ចាំពិធីទទួលផ្លូវការធំនៅដើមឆ្នាំក្រោយ។ឈុតគ្រឿងអលង្ការមាសសម្រាប់លម្អរូបចម្លាក់នាសម័យអង្គរ រួមមានម្កុដ១ ក្បាច់ពាក់សៀតផ្កា១គូ ក្រវិល១គូ ខ្សែក១ ស្នាប់ដៃ១គូ ខ្សែពាក់ឈៀង(ក្រវាត់ទ្រូង) ១គូ និងខ្សែចង្កេះ១។ លោក ប្រាក់ សុណ្ណារ៉ា បន្តថាវត្ថុបូរាណទាំងនេះមានតម្លៃមិនអាចកាត់ថ្លៃបាន ដោយសារវាត្រូវបានធ្វើក្នុងសម័យអង្គររវាងសតវត្សរ៍ទី១១ និង១២នៃគ្រិស្ដសករាជ និងបានឆ្លងកាត់ច្រើនសម័យកាល ទាំងសម័យសង្គ្រាម និងសន្ដិភាព។

ម្យ៉ាងទៀត ឈុតគ្រឿងអលង្ការមាសនេះ លោកថាក៏មានតម្លៃផ្នែកសិល្បៈការរចនា និងក្បូរក្បាច់ ដែលបង្ហាញពី រចនាបថរបស់ខ្មែរតែមួយគត់៕ប្រភព៖everyday news

រដ្ឋសភាលុបឈ្មោះតំណាងរាស្រ្ត និងជំនួយការCNRPជាង១០០នាក់ លែងផ្តល់ប្រាក់ខែ ចាប់ពីខែវិច្ឆិកានេះទៅ

រដ្ឋសភាលុបឈ្មោះតំណាងរាស្រ្ត និងជំនួយការCNRPជាង១០០នាក់ លែងផ្តល់ប្រាក់ខែ ចាប់ពីខែវិច្ឆិកានេះទៅ

លោក ឡេង ប៉េងឡុង អ្នកនាំពាក្យរដ្ឋសភា បានបញ្ជាក់ប្រាប់បណ្តាញព័ត៌មានឱ្យដឹងថា នៅព្រឹកថ្ងៃ ទី២១ ខែវិច្ឆិកា ឆ្នាំ២០១៧នេះថា រដ្ឋសភា ពេលនេះ បានសម្រេចលុបឈ្មោះ តំណាងរាស្រ្តគណបក្សសង្គ្រោះជាតិ ទាំង៥៥រូប និងទីប្រឹក្សា ជំនួយការ អ្នកបើករថយន្ត សរុបជាង១០០នាក់ ចេញពីបញ្ជីក្របខណ្ឌ ហើយពួកគេត្រូវបាន បញ្ចប់មុខងារ និងប្រាក់ខែចាប់ពីខែវិច្ឆិកា ឆ្នាំ២០១៧នេះតទៅ។ការសម្រេចលុបឈ្មោះនេះ បានធ្វើឡើងបន្ទាប់ពី តុលាការកំពូល បានប្រកាសសាលដីកា កាលពីថ្ងៃទី១៦ ខែវិច្ឆិកា ឆ្នាំ២០១៧ ដោយសម្រេចឱ្យ រំលាយគណបក្សសង្រ្គោះជាតិ។ ជាមួយគ្នានោះ តុលាការកំពូលក៏បានប្រកាសហាម ឃាត់ដល់មន្រ្តីថ្នាក់ដឹកនាំគណបក្សសង្រ្គោះជាតិចំនួន១១៨នាក់ មិនឱ្យធ្វើនយោបាយ រយៈពេល៥ឆ្នាំផងដែរ។បើតាម លោក ឡេង ប៉េងឡុង, សម្ភារៈប្រើប្រាស់ ដូចជារថយន្តទំនើបៗ កុំព្យូទ័រ សម្ភារការិយាល័យ របស់អតីត តំណាងរាស្ត្រគណបក្សសង្គ្រោះជាតិទាំងនោះ ក៏ត្រូវរឹបអូសយកមកទុកជាសម្បត្តិរដ្ឋវិញដែរ។សូមបញ្ជាក់ថា ក្រោយពេលរំលាយ នៅពេលនេះ ស្លាក បដា និងពាក្យស្លោកគណបក្សសង្រ្គោះជាតិ នៅតាមបណ្តា រាជធានី ខេត្ត ត្រូវបានរុះរើ និងទម្លាក់ជិតអស់ហើយ ក្នុងនោះក៏មានស្លាកសញ្ញា ទីស្នាក់ការគណបក្សសង្រ្គោះជាតិ ជាច្រើនត្រូវបានសមាជិកបក្សនេះ ទម្លាក់ដោយខ្លួនឯងដែរ៕ប្រភព៖everyday news

Monday, November 20, 2017

អ្នកសិល្បៈ៦រូប បង្ហាញមុខកូនប្រពន្ធទាំងគ្មានដំណឹងរៀបការ

ជាធម្មតាមុនចូលរោងការ ឬបញ្ចប់ភាពនៅលីវ អ្នកសិល្បៈភាគច្រើនតែងប្រកាសប្រាប់មហាជនឲ្យបានដឹងជាសាធារណៈជាក់ជាពុំខាន ដោយឡែកអ្នកសិល្បៈ៦ រូបនេះវិញមិនធ្លាប់លេចឮដំណឹងរៀបការអ្វីឡើយ ស្រាប់តែថ្មីៗនេះបង្ហាញមុខប្រពន្ធកូនជាសាធារណៈធ្វើឲ្យផ្អើលអស់មហាជនទាំងក្នុង និងក្រៅសិល្បៈ។អ្នកសិល្បៈទាំង៦ រូបរៀបរាប់ខាងលើមានដូចជា៖
១/ តារាចម្រៀងផលិតកម្មសាន់ដេ លោក ខាត់ ជេមស៍ បានបង្ហាញមុខមាត់ប្រពន្ធ និងកូនរបស់ខ្លួនជាសាធារណៈក្នុងដំណើរកម្សាន្តមួយនៅលើទឹកដីអង្គរ នៃខេត្តសៀមរាប ក្រោយពីព្យាយាមលាក់បាំង អស់រយៈពេលជាច្រើនឆ្នាំ។

២/ សម្រាប់ពិធីការិនីចាស់វស្សាអ្នកនាង យុគ ចិន្តា វិញបានប្រកាសទទួលស្គាល់ថាកុមារីវ័យជំទង់ ឈ្មោះ អម អាយុ១៤ ឆ្នាំថាជាកូនស្រីខ្លួន។ ការប្រកាសធ្វើឡើងនៅថ្ងៃ អម ចេញទៅប្រឡងចម្រៀងនៅប្រទេសសិង្ហបុរី ក្រោយពីព្យាយាមលាក់បាំងជាច្រើនឆ្នាំថាកុមារីរូបនេះជាក្មួយស្រីរបស់នាង។

៣/ អតីតតារាចម្រៀងផលិតកម្មថោន លោក ណាំ ប៊ុណ្ណារ័ត្ន ក្រោយពីស្ងប់ស្ងាត់ពីសិល្បៈអស់មួយរយៈមក ស្រាប់តែថ្មីៗនេះលោកបានបង្ហាញមុខកូនប្រុសដ៏គួរឲ្យស្រលាញ់ម្នាក់ ធ្វើឲ្យមានការភ្ញាក់ផ្អើលយ៉ាងខ្លាំងពីមហាជន ទាំងក្នុង និងក្រៅសិល្បៈផងដែរ។

៤/ ចំណែកឯតារាសម្ដែងសាច់សខ្ចីអ្នកនាង ឈិត សុជាតា វិញមិនធ្លាប់លេចឮដំណឹងរៀបការ ឬទាក់ទងជាមួយបុរសណាម្នាក់នោះទេ បែរជាបែកធ្លាយព័ត៌មានថានាងមានកូនភ្លោះប្រុសស្រី ២ រូបយ៉ាងស្រស់ស្អាត។

៥/ ងាកមកចាប់អារម្មណ៍អតីត Freshie Boy ជយលាភីលេខ១ កាលពីឆ្នាំ២០០៨ លោក កែវ បូរ៉ា ឯណេះវិញមិនខុសពីរៀមច្បងសិល្បៈខាងលើប៉ុន្មានឡើយ។ លោកបានបង្ហាញមុខប្រពន្ធកូនទៅកាន់មហាជន ទាំងមិនធ្លាប់លេចឮដំណឹងរៀបការ ឬមានទំនាក់ទំនងជាមួយនារីណាម្នាក់ឡើយ។

៦/ក្រឡេកមកចាប់អារម្មណ៍ ឌីជេ ក្ដឹប វិញក៏មិនខុសពីលោក កែវ បូរ៉ា ប៉ុន្មានដែរ ថ្មីនេះលោកបានបង្ហាញរូបថតប្រពន្ធ និងកូនសម្រាកនៅមន្ទីរពេទ្យមួយ ព្រមទាំងទទួលបានការចាប់អារម្មណ៍យ៉ាងខ្លាំងពីអ្នកប្រើប្រាស់បណ្ដាញទំនាក់ទំនងសង្គមទៀតផង។

ប្រភព៖ Sabay

តើរបួសច្រមុះរបស់ Ramos អាចត្រូវអវត្តមានច្រើនថ្ងៃឬយ៉ាងណា?

តើរបួសច្រមុះរបស់ Ramos អាចត្រូវអវត្តមានច្រើនថ្ងៃឬយ៉ាងណា?

Zinedine Zidane ពិតជាព្រួយបារម្ភយ៉ាងខ្លាំងសម្រាប់តំបន់ការពារ បន្ទាប់ពី Sergio Ramos បានរបួសបាក់ខ្ទង់ច្រមុះ ក្នុងជំនួប Madrid Derby រវាង Real Madrid និង Atletico Madrid បញ្ចប់លទ្ធផល ០-០។យ៉ាងណាមិញ តាមការចុះផ្សាយពីកាសែត Marca បញ្ជាក់ថា ខ្សែការពាររឹងមាំអេស្ប៉ាញរូបនេះ នឹងមិនត្រូវការវះកាត់អ្វីទេ ហើយអាចចូលលេងបានដោយពាក់ម៉ាសការពារ។ ដូច្នេះ Ramos នឹងអាចបង្ហាញខ្លួនប្រកួតនៅ La Liga សម្រាប់ប្រកួតបន្ទាប់ជាមួយ Malaga និងAthletic Bilbao ពេលខាងមុខ។

Ramos បានធ្វើការពិនិត្យច្រមុះបន្ថែមកាលពីថ្ងៃអាទិត្យ នៅឯមន្ទីរពេទ្យ La Moraleja ក្រោយត្រូវមួយជើងចំច្រមុះពីសំណាក់កីឡាករ Lucas Hernandez ក្នុងវគ្គទីមួយ។ កីឡាករវ័យ៣១ឆ្នាំបានញ៉ុកសំឡីដើម្បីលេងបន្ត តែដោយសារច្រមុះហើមខ្លាំងពេក ក៏សម្រេចចិត្តប្ដូរចេញនៅនាទី៤៦៕ ប្រភព៖ Marca

ការស្ម័គ្រចិត្តចុះចូលពី សំណាក់អតីតមន្រ្តីរបស់គណបក្សសង្រ្គោះជាតិ នឹងត្រូវបិទត្រឹមថ្ងៃទី២៤ ខែវិច្ឆិកា

ការស្ម័គ្រចិត្តចុះចូលពី សំណាក់អតីតមន្រ្តីរបស់គណបក្សសង្រ្គោះជាតិ នឹងត្រូវបិទត្រឹមថ្ងៃទី២៤ ខែវិច្ឆិកា

ជុំវិញការចុះចូលរបស់អតីតមន្រ្តីថ្នាក់ដឹកនាំ និងមន្រ្តីមូលដ្ឋានរបស់គណបក្សសង្រ្គោះជាតិ ដែលកំពុងសម្រុកចុះចូល យ៉ាងច្រើនរួមជីវភាពនយោបាយជាមួយ គណបក្សប្រជាជនកម្ពុជា ដែលនៅពេលនេះចំនួនបានកើនឡើងរហូតដល់ ជិត៣២០នាក់នៅទូទាំងប្រទេស។ ឆ្លើយតបនឹងការកំណត់ពេលវេលានៃការចុះចូល, ត្រូវបានសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រមុខដឹកនាំគណបក្សប្រជាជនកម្ពុជា បានប្រកាសតាមបណ្តាញព័ត៌មានដ៏ធំ មួយនៅកម្ពុជា Fresh News ឲ្យដឹងថា ការស្ម័គ្រចិត្តចុះចូលពី សំណាក់អតីតមន្រ្តីរបស់គណបក្សសង្រ្គោះជាតិ ចូលគណបក្សប្រជាជនកម្ពុជា មានឱសានវាទត្រឹមថ្ងៃទី២៤ ខែវិច្ឆិកាប៉ុណ្ណោះ។នៅព្រឹកថ្ងៃទី២០ ខែវិច្ឆិកា ឆ្នាំ២០១៧នេះ សម្តេចតេជោ ហ៊ុន សែន បានផ្តល់កិច្ចសម្ភាសន៍ដ៏ពិសេសមួយជាមួយ លោក លឹម ជាវុត្ថា នាយកប្រតិបត្តិបណ្តាញព័ត៌មាន Fresh News ឲ្យដឹងថា៖ «ការស្ម័គ្រចិត្តចុះជាមួយគណបក្ស ប្រជាជនកម្ពុជា មានត្រឹមថ្ងៃទី២៤ ខែវិច្ឆិកាប៉ុណ្ណោះ ព្រោះការរៀបចំបញ្ជីក្រុមប្រឹក្សាឃុំសង្កាត់ថ្មី ដើម្បីបញ្ជូនទៅ កាន់ គជប នឹងត្រូវបិទត្រឹមថ្ងៃទី២៤ ខែវិច្ឆិកា, ប្រសិនបើចាប់ពីថ្ងៃទី២៥ ខែវិច្ឆិកាទៅ ការចុះចូលនៅតែបន្តដដែល ប៉ុន្តែមិនផ្តល់តួនាទីអ្វីនោះទេ»។សម្តេចតេជោ ហ៊ុន សែន បានប្រសាសន៍អំពាវនាវឲ្យអតីតមន្រ្តីគណបក្សសង្រ្គោះជាតិដែលត្រូវបានតុលាការកំពូល កាត់រំលាយ សូមប្រញាប់ប្រញាល់ចុះចូលជាមួយ គណបក្សប្រជាជនកម្ពុជា ដើម្បីទទួលបាននូវតួនាទីឋានៈអ្វីៗ ដដែល ព្រោះការកំណត់ពេលវេលាត្រឹមថ្ងៃទី២៤នេះធ្វើឡើងតាមលក្ខខ័ណ្ឌរបស់គជប។សូមជំរាបថា គិតពេញមួយថ្ងៃនាថ្ងៃទី១៩ ខែវិច្ឆិកា ឆ្នាំ២០១៧នេះ បានទទួលលិខិតពីអតីតថ្នាក់ដឹកនាំមូលដ្ឋាន សំខាន់ៗ សរុបចំនួន៥០នាក់ ដែលបានចុះចូលជាមួយគណបក្សប្រជាជនកម្ពុជា ដែលនេះបានធ្វើឲ្យចំនួនសរុបកើន ឡើងដល់៣១៨នាក់៕ប្រភព៖everyday news

Sunday, November 19, 2017

ទីក្រុងអណ្តែតទឹក ដំបូងបង្អស់លើលោក នឹងត្រូវសាងសង់ឆាប់ៗ

ទីក្រុងអណ្តែតទឹក ដំបូងបង្អស់លើលោក នឹងត្រូវសាងសង់ឆាប់ៗ គំនិតនៃការបង្កើតទីក្រុងអណ្ដែតទឹក ស្ដាប់ទៅហាក់បីដូចជារឿងប្រលោមលោក ឬរឿងប្រឌិតបែបវិទ្យាសាស្ត្រ ប៉ុន្តែវាអាចក្លាយជាការពិត នៅត្រឹមឆ្នាំ២០២០ ខាងមុខនេះ។

វិទ្យាស្ថាន Seasteading Institute ដែលមានមូលដ្ឋាននៅក្នុងទីក្រុង San Francisco សហរដ្ឋអាមេរិក បានបង្កើតគំនិតនេះ ចាប់តាំងពីការបង្កើតគ្រឹះស្ថាន នៅក្នុងឆ្នាំ២០០៨ មកម្ល៉េះ ហើយវាបានឈានដល់ការធ្វើកិច្ចព្រមព្រៀងជាមួយរដ្ឋាភិបាល នៃប្រទេសប៉ូលីណេស៊ី (French Polynesia) ដើម្បីចាប់ផ្ដើមការសាកល្បងនៅក្នុងដែនទឹករបស់ខ្លួនទៀតផង។លោក Joe Quirk នាយកវិទ្យាស្ថាន Seasteading Institute បានប្រាប់សារព័ត៌មាន New York Times ឲ្យដឹងថា «ប្រសិនបើអ្នកអាចមានទីក្រុងអណ្ដែតទឹក នោះវានឹងក្លាយទៅជាប្រទេសចាប់ផ្ដើមដំបូងគេបង្អស់។ យើងអាចបង្កើតអ្វីថ្មីដ៏សម្បូរបែប សម្រាប់ប្រជាពលរដ្ឋជាច្រើនរបស់យើង»។

គួរបញ្ជាក់ថា ទីក្រុងអណ្ដែតទឹកនោះ នឹងមានរចនាសម្ព័ន្ធជាច្រើន រាប់បញ្ចូលទាំង ផ្ទះ សណ្ឋាគារ ការិយាល័យ និង ភោជនីយដ្ឋាន ជាដើម ខណៈក្រុមវិស្វករ និងស្ថាបត្យករ បានទៅមើលទីតាំង សម្រាប់គម្រោងមួយនេះរួចទៅហើយ។យ៉ាងណាមិញ លោក Quirk បានអះអាងថា ការសាងសង់អគារនៅលើដែនសមុទ្រនេះ នឹងចំណាយអស់ប្រហែល ១៦៧លានដុល្លារ ខណៈវិទ្យាសាស្ត្រ Seasteading Institute បានទទួលទុនជំនួយ (seed funding) ពីស្ថាបនិករបស់ក្រុមហ៊ុន PayPal លោក Peter Thiel រួចទៅហើយ៕ប្រភព៖ Boredpanda

Mark ដឹងថា Facebook ធ្វើឲ្យមនុស្សញៀន នៅតែបង្កើតវា

Mark ដឹងថា Facebook ធ្វើឲ្យមនុស្សញៀន នៅតែបង្កើតវា

Sean Parker ដែលជាប្រធានដំបូងគេរបស់បណ្ដាញសង្គម Facebook បានទទួលស្គាល់ថាពេលនេះខ្លួនក្លាយជាអ្នកជំទាស់មួយរូបចំពោះបណ្ដាញសង្គម Facebook។អតីតប្រធានវ័យ ៣៧ ឆ្នាំរូបនេះបាននិយាយក្នុងកិច្ចសម្ភាសន៍មួយថា ៖ "Facebook បានផ្លាស់ប្ដូរទំនាក់ទំនងអ្នកជាមួយសង្គម និងអ្នកជុំវិញខ្លួន។ មានតែព្រះជាម្ចាស់ទេទើបដឹងថាវាបានជះឥទ្ធិពលដល់ខួរក្បាលកូនៗរបស់យើងបែបណាខ្លះ”។ គាត់បន្ថែមថា Facebook ផលិតឡើងដើម្បីវាយឲ្យចំចំណុចខ្សោយរបស់មនុស្ស ធ្វើឲ្យអ្នកប្រើប្រាស់ញៀន។ Sean បន្តលើកឡើងទៀតថា ៖ "អ្នកបង្កើត រួមមានខ្ញុំ, Mark Zuckerberg និង Kevin Systrom ដែលជាអ្នកបង្កើត Instagram សុទ្ធតែដឹងពីចំណុចនេះ ហើយយើងនៅតែសម្រេចធ្វើវា"។Sean ដែលបច្ចុប្បន្នជាស្ថាបនិកវិទ្យាស្ថានព្យាបាលជំងឺមហារីកបានពន្យល់ថា Facebook ប្រើប្រាស់ចំនួន Like និង Share ដើម្បីបង្កើតជា Loop មួយធ្វើឲ្យអ្នកប្រើប្រាស់មិនអាចដកចិត្តបាន។ វាជាការលើកទឹកចិត្តមួយដែលជួយឲ្យអ្នកផ្ដល់នូវ Content (ការបង្ហោះរូបភាព, វីដេអូ ឬ Status) ឲ្យ Facebook ជាបន្តបន្ទាប់។មហាសេដ្ឋីរូបនេះបន្ថែមថា គោលគំនិតនៃការបង្កើត Facebook ដំបូងកើតចេញពីការរិះរកវិធីដើម្បីទាញយកពេលវេលា និងការយកចិត្តទុកដាក់របស់មនុស្សឲ្យបានច្រើនតាមដែលអាចទៅរួច៕ ប្រភព៖ nypost

ហេតុអ្វីភាពយន្តខ្នាតខ្លីប្រមូលផ្ដុំដោយជើងខ្លាំងក្បាច់គុនរបស់មហាសេដ្ឋីចិន Jack Ma បែរជាគ្មានឈិនឡុង?

ហេតុអ្វីភាពយន្តខ្នាតខ្លីប្រមូលផ្ដុំដោយជើងខ្លាំងក្បាច់គុនរបស់មហាសេដ្ឋីចិន Jack Ma បែរជាគ្មានឈិនឡុង?

កំពូលខ្សែភាពយន្តខ្នាតខ្លីប្រមូលផ្ដុំដោយជើងខ្លាំងក្បាច់គុនរបស់មហាសេដ្ឋីចិន Jack Ma កំពុងបង្កបានការចាប់អារម្មណ៍ជាខ្លាំង។ តែមហាជនកំពុងឆ្ងល់ថាហេតុអ្វីបានជាអវត្តមានតារាសម្ដែង ឈិន ឡុងទៅវិញ។ខ្សែភាពយន្ត "Gong Shu Dao” ទទួលបានចំណាប់អារម្មណ៍របស់ទស្សនិកជនតាំងពីមិនទាន់បានថតម្ល៉េះត្បិតប្រមូលផ្ដុំដោយអ្នកខ្លាំងផ្នែកគុនទាំង១១នាក់ក្នុងនោះរួមមាន លី លានជា និងកុំកុំជាដើម។ សូម្បីតែ Wu Jing និងហុង ជីនប៉ាវក៏សុខចិត្តមកថតទាំងខ្លួនកំពុងរបួសដែរ។

យ៉ាងណាក៏ដោយ រឿងនេះនៅខ្វះជើងខ្លាំងពីររូបគឺ Vincent Zhao និង Jackie Chen។ ចំពោះ Vincent Zhao វាជារឿងធម្មតាទេដែលលោកមិនចូលរួមព្រោះមានជម្លោះយូរឆ្នាំជាមួយកុំកុំ។ Vincent ធ្លាប់ប្រកាសក្ដែងៗថាគ្មានថ្ងៃសហការជាមួយតួរឿង "Ip Man” នោះឡើយ។ផ្ទុយមកវិញ អវត្តមានរបស់កំពូលតារាសម្ដែងក្បាច់គុនឈិន ឡុងត្រូវបានគេសន្និដ្ឋានថាមានជាប់ទាក់ទងជាមួយតារាសម្ដែង លី លានជាទៅវិញ។ នៅក្នុង "Gong Shu Dao” តួរឿង "វ៉ាងហ្វីហុង" ក្រៅពីមានតួនាទីជាតារាសម្ដែងនោះ ក៏មានតំណែងជាផលិតករថែមទៀត។ លោកមានសិទ្ធិលើការជ្រើសរើសតារាសម្ដែងទាំងអស់។ ប្រភពនានាបានឲ្យដឹងថា បើទោះបីជា លី លានជា និងឈិន ឡុងធ្លាប់សហការគ្នាក៏ដោយ តែឈិន ឡុងតែងបង្ហាញពីភាពអំនួតរបស់ខ្លួនចំពោះសិស្សប្អូនជានិច្ច ដែលជាហេតុធ្វើឲ្យគេគិតថាលោកមិនត្រូវបានគេអញ្ជើញឲ្យថតរឿងនេះ។ពាក់ព័ន្ធនឹងមន្ទិលសង្ស័យខាងលើ ភាគីទាំងសងខាងសុទ្ធតែមិនទាន់បានបញ្ចេញមតិអ្វីទាំងអស់ ហើយចាប់តាំងពីពេលរឿងដាក់បញ្ចាំងមក ឈិន ឡុងក៏មិនទាន់បានមានយោបល់អ្វីនោះដែរ៕ប្រភព៖ Zing

Bill Gates ចំណាយលុយ ៨០លានដុល្លារ ក្នុងគោលដៅអភិវឌ្ឍទៅជាទីក្រុងឆ្លាតវៃ នៅថ្ងៃអនាគត

Bill Gates ចំណាយលុយ ៨០លានដុល្លារ ក្នុងគោលដៅអភិវឌ្ឍទៅជាទីក្រុងឆ្លាតវៃ នៅថ្ងៃអនាគត

ក្រុមហ៊ុនវិនិយោគអចលនទ្រព្យរបស់សេដ្ឋីលោក Bill Gates កាលពីពេលថ្មីៗនេះ បានទិញដីមួយកន្លែងនៅរដ្ឋ Arizona សហរដ្ឋអាមេរិក ថ្លៃខ្ទង់ ៨០ លានដុល្លារ ក្នុងគោលដៅអភិវឌ្ឍទៅជាទីក្រុងឆ្លាតវៃ។ក្រុមហ៊ុនវិនិយោគជាដៃគូរបស់ Gates មានឈ្មោះ Belmont Partners មានមូលដ្ឋានក្នុងតំបន់នោះស្រាប់ បានឲ្យដឹងថាដីដែលក្រុមហ៊ុនទិញ មានទំហំ ២៥,០០០ Arces (១ Arce = ០,៤ ហិចតា) បង្កើតទីក្រុងឆ្លាតវៃមានឈ្មោះ Belmont។ នេះបើយោងតាមរបាយការណ៍ចុះផ្សាយពី KPNX។ហេដ្ឋារចនាសម្ព័ន្ធក្នុងទីក្រុង នឹងគ្របដណ្ដប់ដោយប្រព័ន្ធបច្ចេកវិទ្យាទំនើប, តភ្ជាប់បណ្ដាញឌីជីថលល្បឿនលឿន, មជ្ឈមណ្ឌលផ្ទុកទិន្នន័យ, ប្រមូលផ្ដុំរថយន្តបើកដោយស្វ័យប្រវត្តិ និងផលិតកម្មថ្មីៗជាច្រើនទាក់ទងបច្ចេកវិទ្យាសុទ្ធសាធ។ប្រភពខាងលើបន្តទៀតថា ទំហំផ្ទៃដីទាំងមូលនឹងអាចផ្ទុកប្រជាជនបានប្រហែល ៨ ម៉ឺននាក់ ដោយដី ៤៧០ Acres សម្រាប់បង្កើតសាលារដ្ឋ និងដី ៣,៨០០ Arces សម្រាប់បង្កើតការិយាល័យ, អគារពាណិជ្ជកម្ម និងហាងលក់ចែកចាយ។Gates បានបញ្ជាក់ថា Smart City នឹងដើរតាមគន្លងនៃការអភិវឌ្ឍស្រដៀងគ្នាមានក្នុងទីក្រុង Columbus រដ្ឋ Ohio។ប្រភព៖ Foxnews

Saturday, November 18, 2017

ថៃនិងចិនសហការជាគ្នា បង្កើតរោងចក្រផលិតអាវុធ

ថៃនិងចិនសហការជាគ្នា បង្កើតរោងចក្រផលិតអាវុធ

បាងកក៖ ទីភ្នាក់ងារបច្ចេកវិទ្យាការពារជាតិរបស់ថៃ គ្រោងនឹងបង្កើតរោងចក្រមួយរួមគ្នាជាមួយនឹងចិន ដើម្បីផលិត និងថែទាំបរិក្ខាយោធា ហើយដែលនេះគឺជាសញ្ញានៃការពង្រឹង ទំនាក់ទំនងសន្តិសុខកាន់តែខ្លាំងរវាងទីក្រុងបាងកក និងទីក្រុងប៉េកាំង គិតចាប់តាំងពីមានរដ្ឋប្រហារយោធា កាលពីឆ្នាំ២០១៤មក។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅព្រឹកថ្ងៃសុក្រ ទី១៦ ខែវិច្ឆិកា ឆ្នាំ២០១៧។យោងតាមអ្នកនំាពាក្យក្រសួងការពារជាតិថៃ លោក Kongcheep Tantravanich វិទ្យាស្ថានបច្ចេកវិទ្យាការពារ ជាតិ នៃរដ្ឋាភិបាលថៃ (DTI) នឹងសាងសង់រោងចក្រពាណិជ្ជកម្ម ខាងវិស័យការពារជាតិជាលើកដំបូងរបស់ថៃ ក្រោម ការចូលរួមជាមួយភាគីចិន នៅឯភាគឦសាននៃខេត្ត Khon Kaen នៅខែកក្កដា ឆ្នាំ២០១៨ ខាងមុខនេះ។ រោងចក្រនេះនឹងត្រូវទទួលខុសត្រូវ លើការតម្លើង ផលិត និងថែទាំប្រព័ន្ធអាវុធរបស់ចិន សម្រាប់យោធាថៃ។

លោក Tantravanich បញ្ជាក់ដូច្នេះថា «រាល់ផលិតផលរបស់យើង នឹងត្រូវប្រើប្រាស់ជាផ្លូវការនៅ ក្នុងស្រុក ហើយ វាក៏អាចនឹងក្លាយជារោងចក្រតម្លើង និងថែទាំបរិក្ខាយោធា សម្រាប់បណ្ដាប្រទេសទាំងអស់ ជាសមាជិកអាស៊ានផង ដែរ។ ប៉ុន្តែទោះជាយ៉ាងនេះក្ដី ក្រសួងការពារជាតិចិន មិនបានធ្វើអត្ថាធិប្បាយអ្វីឡើយ នៅពេលត្រូវបានសាកសួរដោយ ទីភ្នាក់ងារសារព័ត៌មាន Reuters។គួរបញ្ជាក់ថា ទំនាក់ទំនងរវាងចិន និងថៃ ចាប់ផ្ដើមល្អនឹងគ្នាក្រោយមានរដ្ឋប្រហារយោធា ទម្លាក់រដ្ឋាភិបាលថៃរបស់ លោកស្រី យីងឡាក់ កាលពីឆ្នាំ២០១៤ ហើយទំនាក់ទំនងនេះ កាន់តែល្អប្រសើរឡើងបន្ទាប់ពីសហរដ្ឋអាមេរិករិះគន់ លើយោធា ដែលបានងារមករកចិន តាមរយៈការចុះកិច្ចព្រមព្រៀងទិញអាវុធពីទីក្រុងប៉េកាំង៕ប្រភព៖everyday news

កម្ពុជាជាប់លេខ១៩ ក្នុងចំណោមប្រទេស ២០ នៅអាស៊ី ខាងសមត្ថភាពភាសាអង់គ្លេស

កម្ពុជាជាប់លេខ១៩ ក្នុងចំណោមប្រទេស ២០ នៅអាស៊ី ខាងសមត្ថភាពភាសាអង់គ្លេស បើតាមស្ថិតិអំពីសមត្ថភាពភាសាអង់គ្លេសឆ្នាំ ២០១៧ របស់ Education First (EF) ដែលជាស្ថាប័នអប់រំដ៏ល្បីឈ្មោះមួយរបស់ប្រទេសស្វីស បានបង្ហាញឲ្យឃើញថា កម្ពុជា ជាប់លេខ ១៩ ក្នុងចំណោមប្រទេស ២០ នៅអាស៊ី។

បើតាមស្ថិតិមួយនេះ កម្ពុជាទទួលបានពិន្ទុ ៤០.៨៦ ជាប់លេខ ១៩ ខ្ពស់ជាងឡាវដែលទទួលបានពិន្ទុ ៣៧.៥៦ ជាប់លេខ ២០ ដែលជាចំណាត់ថ្នាក់ក្រោមបំផុត ក្នុងតារាងនេះ។ ប្រទេសជិតខាងកម្ពុជា ពោលគឺវៀតណាម និងថៃសុទ្ធតែទទួលបានពិន្ទុខ្ពស់ជាងកម្ពុជាក្នុងស្ថិតិនេះ ដោយថៃ ទទួលបាន ៤៩.៧៨ ពិន្ទុ ឈរ ៣ លេខលើកម្ពុជា ខណៈវៀតណាមជាប់រហូតដល់លេខ ៧ ដោយបាន ៥៣.៤៣ ពិន្ទុ។ក្រៅពីនេះ ក៏មានប្រទេសអាស៊ានចំនួនដល់ទៅ បីទៀត បានដណ្ដើមចំណាត់ថ្នាក់កំពូលៗ ក្នុងតារាងស្ថិតិនេះ ក្នុងនោះ សិង្ហបុរី ទទួលបានពិន្ទុ ៦៦.០៣ ឈរលេខ ១ ខណៈម៉ាឡេស៊ី ជាប់លេខ ២ បាន ៦១.០៧ ពិន្ទុ ហើយហ្វីលីពីនទទួលបាន ៦០.៥៩ ពិន្ទុ ឈរលើចំណាត់ថ្នាក់លេខ ៣។ ឥណ្ឌូណេស៊ីក៏ទទួលបានពិន្ទុខ្ពស់មិនណយដែរ ដោយបាន ៥២.១៥ ពិន្ទុ ឈរលេខ ១០។ក្រឡេកមើលមហាអំណាចអាស៊ីវិញ ឥណ្ឌា ជាប់ដល់ទៅលេខ ៤ ក្នុងតារាងនេះ ដោយទទួលបាន ៥៦.១២ ពិន្ទុ ខណៈកូរ៉េខាងត្បូងមានពិន្ទុតិចជាងឥណ្ឌាតែ ១ពិន្ទុជាង ប៉ុណ្ណោះ ឈរលេខ ៦។ ចិន និងជប៉ុនមានចំណាត់ថ្នាក់ជិតគ្នា ដោយចិនមានពិន្ទុ ៥២.៤៥ ជាប់លេខ ៨ ខណៈជប៉ុនបានពិន្ទុតិចជាងចិនតែ ០.១១ ប៉ុណ្ណោះ ធ្វើឲ្យប្រទេសនេះជាប់លេខ ៩៕ប្រភព៖ Coconut

ចាន់ វឌ្ឍនាកា នឹងត្រឡប់មកកម្ពុជាវិញដើមខែធ្នូខាងមុខនេះ

ចាន់ វឌ្ឍនាកា នឹងត្រឡប់មកកម្ពុជាវិញដើមខែធ្នូខាងមុខនេះ

ខ្សែប្រយុទ្ធជម្រើសជាតិកម្ពុជា ចាន់ វឌ្ឍនាកានឹងវិលត្រឡប់កម្ពុជាវិញនាដើមខែធ្នូ ឆ្នាំ២០១៧នេះហើយ បន្ទាប់ពីត្រូវក្លឹប Fujieda MYFC បានខ្ចីជើងមួយរដូវកាលយកទៅលេងលីគលំដាប់ទី៣របស់ប្រទេសជប៉ុន។តាមប្រភពច្បាស់ការបានឲ្យដឹងថា ចាន់ វឌ្ឍនាកានឹងវិលត្រឡប់មកប្រទេសកម្ពុជាវិញនាដើមខែធ្នូខាងមុខនេះហើយ។ ជុំវិញការវិលត្រឡប់មកវិញ លោក បែ មករា អ្នកចាត់ការក្លឹបបឹងកេតទទួលស្គាល់ថា ពិតជាមកវិញមែន និងបញ្ជាក់ថា ពេលកីឡាករដើមកំណើតខេត្តកំពតនេះមកវិញគឺនៅតែជាកីឡាកររបស់បឹងកេតដដែល។ ប៉ុន្តែអ្នកចាត់ការរូបនេះមិននិយាយអ្វីជុំវិញអាជីពរបស់វឌ្ឍនាកាថាតើលេងឲ្យបឹងកេតក្នុងប្រទេសកម្ពុជារដូវកាលក្រោយ ឬចេញទៅប្រកបអាជីពនៅក្លឹបណាមួយក្នុងប្រទេសអាស៊ាន។តារាឆ្នើមជម្រើសជាតិកម្ពុជា ចាន់ វឌ្ឍនាកា បានបង្កើតកំណត់ត្រាជាប្រវត្តិសាស្ត្រក្នុងការក្លាយជាកីឡាករបាល់ទាត់កម្ពុជាទី១បានទៅប្រកបអាជីពនៅក្នុងទឹកដីនៃប្រទេសរីកចម្រើនផ្នែកបាល់ទាត់គឺជប៉ុន បន្ទាប់ពីប្រកាសផ្លូវការក្នុងសន្និសីទចុះហត្ថលេខាក្នុងលក្ខខណ្ឌខ្ចីជើង១រដូវកាលទៅក្លឹប Fujieda MYFC កាលពីថ្ងៃទី១៣ ខែមករា ឆ្នាំ២០១៧នេះ។ ទោះជាយ៉ាងណា មួយរដូវកាលនៅលីគទី៣ជប៉ុន កីឡាករកម្ពុជារូបនេះបានបង្ហាញលើកដំបូងតែប៉ុន្មាននាទីប៉ុណ្ណោះកាលពីថ្ងៃទី២២ ខែតុលាកន្លងទៅនេះ។ ទោះជាយ៉ាងណា កីឡាករកម្ពុជារូបនេះពោរពេញដោយសេចក្តីអត់ធន់ បើទោះជាមិនបានលេងក៏ដោយ ក៏បានតាំងចិត្តហ្វឹកហាត់ និងស្នាក់នៅទីនោះរហូតចប់កុងត្រាពេញលេញ៕ប្រភព៖ Sabay

ត្បូងថ្មទម្ងន់ ៣០០តោន ជីកបានឆ្នាំមុន មានតំលៃហួសពីការរំពឹងទុក

ត្បូងថ្មទម្ងន់ ៣០០តោន ជីកបានឆ្នាំមុន មានតំលៃហួសពីការរំពឹងទុក

ត្បូងថ្មមានទម្ងន់ ៣០០តោនដែលត្រូវបានរកឃើញកាលពីឆ្នាំមុនក្នុងរដ្ឋ Kachin ប្រទេសមីយ៉ាន់ម៉ា ត្រូវបានគេឲ្យតម្លៃ ៧,៣លានដុល្លារ ហើយគ្រោងនឹងកាត់ជាបំណែកតូចៗមុននឹងលក់វា។ត្បូងនេះមានប្រវែង ៥,៧ម៉ែត្រ ទទឹង៤,៥ម៉ែត្រ និងកម្ពស់៤,២ម៉ែត្រ ហើយត្រូវបានរកឃើញកាលពីថ្ងៃទី១០ ខែតុលា ឆ្នាំ២០១៦ នៅជម្រៅ ៦០ម៉ែត្រក្នុងភ្នំមួយ ដោយក្រសួងធនធានធម្មជាតិ និងអភិរក្សបរិស្ថាន រួមជាមួយនឹងក្រុមហ៊ុនត្បូង Yadanar Taung Tann។នៅពេលរកឃើញដំបូង ត្បូងដ៏ធំនេះត្រូវបានគេប៉ាន់ស្មានថាមានទម្ងន់ត្រឹមតែ ១៧៤តោន និងតម្លៃជាង ៥លានដុល្លារប៉ុណ្ណោះ។ ប៉ុន្តែក្រោយមកទម្ងន់និងតម្លៃរបស់វាត្រូវបានគេរាយការណ៍ពីចំនួនជាក់លាក់ជាបន្តបន្ទាប់។ទោះជាយ៉ាងណាក៏ដោយអ្នករិះគន់មួយចំនួននៅក្នុងឧស្សាហកម្មត្បូងនេះ បានសម្ដែងការព្រួយបារម្ភថា ត្បូងដ៏ធំសម្បើមនេះត្រូវបានគេបន្ទាបតម្លៃ។ ក្រុមអ្នកអង្កេតការណ៍អន្តរជាតិមួយចំនួនបាននិយាយថាត្បូងនេះអាចមានតម្លៃរហូតដល់ ១៧០លានដុល្លារនៅពេលដែលគេកាត់ និងយកវាទៅច្នៃ។ ការបន្ទាបតម្លៃនេះគឺក្នុងគោលបំណងកាត់បន្ថយពន្ធដែលត្រូវបង់ឲ្យរដ្ឋាភិបាល ដូច្នេះហើយម្ចាស់ក្រុមហ៊ុនត្បូងអាចទទួលបានចំណូលច្រើន។តាមច្បាប់របស់មីយ៉ាន់ម៉ា ក្រុមហ៊ុន Yadanar Taung Tann នឹងត្រូវបង់ពន្ធដំបូង ២០% លើត្បូង។ បន្ទាប់មកនៅពេលដែលត្បូងត្រូវបានកាត់យកទៅលក់ ក្រុមហ៊ុនត្រូវបង់ពន្ធលើការលក់ ២០% ពន្ធពាណិជ្ជកម្ម ៥% និងថ្លៃសេវាផ្សេងៗ ៣% ទៀត។ ដូច្នេះរដ្ឋាភិបាលមីយ៉ាន់ម៉ារំពឹងថានឹងអាចទទួលបានជាង ១,៥លានដុល្លារពីត្បូងនេះ។តាមការស៊ើបអង្កេតរបស់អង្គការ Global Witness កាលពីដើមឆ្នាំនេះបានឲ្យដឹងថា រ៉ែត្បូងដែលមាននៅក្នុងរដ្ឋ Kachin នេះបានផ្ដល់ចំណូលជាង ៣១ពាន់លានដុល្លារកាលពីឆ្នាំ ២០១៤ ដែលស្ទើរតែស្មើពាក់កណ្ដាលនៃ GDP ទាំងមូលរបស់មីយ៉ាន់ម៉ា។ឥឡូវនេះត្បូងត្រូវបានគេរក្សាទុកនៅក្នុងឃ្លាំងមួយនៅសង្កាត់ Dekkhinathiri ក្រុង Naypyidaw ស្ថិតក្រោមការការពារដ៏តឹងរ៉ឹង។ បំណែកតូចៗរបស់ត្បូងនឹងត្រូវបានគេកាត់យកទៅលក់នៅមជ្ឈមណ្ឌលពាណិជ្ជកម្មត្បូងរបស់មីយ៉ាន់ម៉ានៅថ្ងៃទី១២ ខែធ្នូ ខាងមុខនេះ៕ឥឡូវនេះត្បូងត្រូវបានគេរក្សាទុកនៅក្នុងឃ្លាំងមួយនៅសង្កាត់ Dekkhinathiri ក្រុង Naypyidaw ស្ថិតក្រោមការការពារដ៏តឹងរ៉ឹង។ បំណែកតូចៗរបស់ត្បូងនឹងត្រូវបានគេកាត់យកទៅលក់នៅមជ្ឈមណ្ឌលពាណិជ្ជកម្មត្បូងរបស់មីយ៉ាន់ម៉ានៅថ្ងៃទី១២ ខែធ្នូ ខាងមុខនេះ៕

Saturday, November 11, 2017

អ្នកគាំទ្របាល់ទាត់ហុងកុង បំពានច្បាប់ភ្លេងជាតិចិន

អ្នកគាំទ្របាល់ទាត់ហុងកុង បំពានច្បាប់ភ្លេងជាតិចិន

ក្រុមអ្នកគាំទ្របាល់ទាត់រាប់រយនាក់នៅទីក្រុងហុងកុង បានប្រឆាំងនឹងច្បាប់របស់ប្រទេសចិន ដោយមិនគោរពភ្លេងជាតិចិន ដោយបានស្រែកចំអកនិងជេរប្រមាថចំពោះភេ្លងជាតិនេះ នៅក្នុងអំឡុងការប្រកួតមិត្តភាពជាអន្តរជាតិ ទល់នឹក្រុមបាល់ទាត់របស់ប្រទេសបារ៉ែន កាលពីថ្ងៃព្រហស្បតិ៍ ទី៩វិច្ឆិកា។នៅឯពហុកីឡាដ្ឋាន Mong Kok អ្នកគាំទ្រមួយចំនួនក្នុងហ្វូងមនុស្សរាប់រយនាក់បានគ្រវីបដាតវ៉ា ហើយវាយស្គរ មុនពេលស្រែកជេរប្រមាថចំពោះភេ្លងជាតិចិន នៅមុនពេលការប្រកួតចាប់ផ្តើម។ភាពចម្រូងចម្រាស់នេះ គឺជាហេតុការណ៍មួយទៀតនៃភាពតានតឹងនាពេលថ្មីៗនេះនៅទីក្រុងហុងកុងដែលជាដែនដីនៃអតីតអាណានិគមអង់គ្លេសនេះ រវាងពួកអ្នកគាំទ្រនិយមលទ្ធិប្រជាធិបតេយ្យ និងក្រុមមេដឹកនាំបក្សកុម្មុយនីស្តចិន ដែលត្រូវបានគេរិះគន់ចំពោះការរឹតបន្តឹងការគ្រប់គ្រងរបស់ខ្លួន លើស្វ័យភាពនិងសេរីភាពរបស់ក្រុងហុងកុង។កាលពីថ្ងៃសៅរ៍ ប្រទេសចិនបានអនុម័តច្បាប់ព្រហ្មទណ្ឌដែលអាចដាក់ទណ្ឌកម្មជាប់គុករហូតដល់៣ឆ្នាំចំពោះការមិនគោរពភ្លេងជាតិចិននេះ ។នៅឯការប្រកួតកាលពីថ្ងៃព្រហស្បតិ៍នោះ អ្នកគាំទ្រមួយចំនួនបានបដិសេធមិនក្រោកឈរ ហើយ អ្នកផ្សេងទៀតបានបែរខ្នងរបស់ពួកគេ ខណៈដែលបទភ្លេងជាតិចិន ត្រូវបានចាក់នោះ។ ប៉ុន្តែ នៅពេលភ្លេងជាតិបារ៉ែន ត្រូវបានចាក់នោះ ស្ទើរតែទាំងអស់នៃអ្នកគាំទ្រចំនួនចំនួន២.៤០០នាក់នៅក្នុងពហុកីឡាដ្ឋាននេះ បានក្រោកឈរគោរពភ្លេងជាតិបារ៉ែន ដោយប្រកបដោយការគោរព។ក្រុមអ្នកគាំទ្រមួយចំនួន បានស្រែកថា “ពួកយើងជាអ្នកទីក្រុងហុងកុង…មិនមែនចិនទេ” ។ អ្នកខ្លះទៀតបានកាន់បដាសេរសរថា “សុខចិត្តស្លាប់ដើម្បីហុងកុង”។លោក រ៉យ តាំ អ្នកនយោបាយក្រុងហុងកុង ដែលបានចូលរួមមើលការប្រកួតនេះ បាននិយយាថា “គ្រប់គ្នានៃប្រជាជនហុងកុងគួរតែមានសិទ្ធិក្នុងការច្រៀងភេ្លងជាតិនេះ ឬ មិនច្រៀងវា… នេះជាផ្នែកមួយនៃសិទ្ធិសេរីភាពនៃហុងកុង”។ ក្រុងហុងកុង ត្រូវបានប្រគល់ឱ្យចិនគ្រប់គ្រងវិញពីអង់គ្លេស កាលពីឆ្នាំ១៩៩៧៕ប្រភព៖everyday news

អ្នកគាំទ្រកម្ពុជាម្នាក់សុំទិញអាវ គួច សុកុម្ភៈ ដែលបានពី Kagawa ក្នុងតម្លៃខ្ពស់

អ្នកគាំទ្រកម្ពុជាម្នាក់សុំទិញអាវ គួច សុកុម្ភៈ ដែលបានពី Kagawa ក្នុងតម្លៃខ្ពស់

ខ្សែបម្រើឆ្នើម និងប្រធានក្រុមជម្រើសជាតិកម្ពុជា គួច សុកុម្ភៈ បានទម្លាយថា អាវដែលរូបគេទទួលបានពីខ្សែបម្រើឆ្នើមជប៉ុន Shinji Kagawa មានអ្នកគាំទ្រកម្ពុជាម្នាក់សុំទិញក្នុងតម្លៃខ្ពស់ជិត ១ពាន់ដុល្លារអាមេរិក។កីឡាករពាក់លេខ ១០ រូបនេះបានឲ្យដឹងថា អាវជម្រើសជាតិជប៉ុនដែល Kagawa ពាក់ទាំងក្នុងដី និងក្រៅដីគឺកីឡាករជប៉ុនរូបនេះប្រគល់មកឲ្យគេទាំងពីរ។ ការទទួលបាននេះក្រោយកម្ពុជាប្រកួតចាញ់ជប៉ុនទាំងពីរជើង ដែលជើងទី១ ចាញ់ ៣-០ នៅទឹកដីជប៉ុន និងជើងទី២ ចាញ់ ជប៉ុន ២-០ នៅដីកម្ពុជា ក្នុងការប្រកួតជម្រុះ World Cup ។កីឡាកររបស់ណាហ្គាវើលរូបនេះបញ្ជាក់ថា ក្រោយទទួលបានអាវពីកីឡាករជប៉ុនភ្លាម មានអ្នកគាំទ្រម្នាក់បានទៅសួរនាំចង់ទិញក្នុងតម្លៃ ៥០០ដុល្លារ ក្រោយមកដោយឃើញ កុម្ភៈ មិនលក់ក៏ហ៊ានឲ្យថ្លៃដល់ ១ពាន់ដុល្លារ តែយ៉ាងណាកីឡាករជម្រើសជាតិកម្ពុជារូបនេះមិនព្រមលក់ឡើយ។ ចំពោះមូលហេតុក្នុងការមិនព្រមលក់អាវ ដែល Shinji Kagawa ឲ្យក្នុងតម្លៃខ្ពស់បែបនេះ ពីព្រោះកីឡាករវ័យជាង៣០ឆ្នាំប្លាយរូបនេះទុកវាជាវត្ថុអនុស្សាវរីយ។សូមបញ្ជាក់ថា ក្រោយបាត់មុខពីជម្រើសជាតិមួយរយៈ គួច សុកុម្ភៈ ជាកីឡាករ ដែលទើបបានជាប់ជម្រើសជាតិឡើងវិញ ក្រោយពេលលោក ប្រាក់ សុវណ្ណារ៉ា ចូលកាន់តំណែងជាគ្រូជម្រើសជាតិកម្ពុជាជំនួសលោក Leonardo Vitorino ដែលត្រូវបានសហព័ន្ធបណ្ដេញចេញ៕ប្រភព៖ Sabay

Thursday, November 9, 2017

សម្តេចតេជោ ហ៊ុន សែន ជួបសំណេះសំណាលជាមួយកម្មករ កម្មការិនីជាង ១ម៉ឺន៤ពាន់នាក់ នៅចំការដូង

សម្តេចតេជោ ហ៊ុន សែន ជួបសំណេះសំណាលជាមួយកម្មករ កម្មការិនីជាង ១ម៉ឺន៤ពាន់នាក់ នៅចំការដូង

សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជានៅព្រឹកថ្ងៃពុធ ទី០៨ ខែវិច្ឆិកា ឆ្នាំ២០១៧នេះ បន្តជួបសំណេះ សំណាលជាមួយកម្មករ កម្មការិនីសរុបប្រមាណ ១,៤០០នាក់ មកពីរោងចក្រចំនួន២០ នៅតំបន់ចំការដូង ក្នុងខណ្ឌដង្កោ។សម្តេចតេជោ ហ៊ុន សែន បានសម្រេចចុះជួបសំណេះសំណាលដោយផ្ទាល់ជាមួយកម្មករ កម្មការិនីនៅតាមបណ្តា រោងចក្រនានា ដើម្បីស្វែងយល់ពីសុខទុក្ខរបស់កម្មករ កម្មការិនី និងដើម្បីដោះស្រាយបញ្ហាប្រឈមមួយចំនួនរបស់ កម្មករ កម្មការិនីផងដែរ។ ជាពិសេសដើម្បីជំរុញការអនុវត្តន៍គោលនយោបាអភិវឌ្ឍន៍វិស័យ ឧស្សាហកម្មឲ្យកាន់តែ មានប្រសិទ្ធភាពខ្ពស់។ចាប់តាំងពីខែកញ្ញាមក សម្តេចតេជោ ហ៊ុន សែន បានចុះជួបសំណេះសំណាលជាមួយតំណាង និងកម្មករ កម្មការិនីចំនួន ១៥លើករួចមកហើយ។ ក្នុងជំនួបទាំង១៥លើកនេះ សម្តេចបានជួបសំណេះសំណាលជាមួយកម្មករ កម្មការិនីសរុបប្រមាណជា ១២ម៉ឺននាក់រួចហើយ។

តាមរយ:កម្មវិធីសំណេះសំណាលនេះ សម្តេចតេជោ ហ៊ុន សែន រកឃើញបញ្ហាប្រឈមជាច្រើនរបស់កម្មករ កម្មការិនី ក្នុងការបម្រើការងាររបស់ពួកគេ ហើយក៏បានផ្តល់ដំណោះស្រាយជាបន្តបន្ទាប់។ តាមរយៈជំនួបជាបន្តបន្ទាប់នេះ សម្តេចតេជោ ហ៊ុន សែន ក៏បានផ្តល់នូវកញ្ចប់អត្ថប្រយោជន៍ជាបន្តបន្ទាប់ដល់បងប្អូន កម្មករ កម្មការិនី ដើម្បីពង្រឹងសន្តិភាព ស្ថិរភាព ការរក្សានិងបង្កើតការងារជូនកម្មករ និយោជិត ការសម្រួលដល់ការ វិនិយោគ ការលើកកម្ពស់ជីវភាពរបស់កម្មករ និយោជិត និងនិយោជក។កញ្ចប់អត្ថប្រយោជន៍ដែលសម្តេចបានផ្តល់ជូនកម្មករ និយោជិតនោះរួមមាន៖* អនុញ្ញាតឲ្យកម្មករ និយោជិត មកពីគ្រប់វិស័យជិះរថយន្តក្រុងរបស់សាលារាជធានីភ្នំពេញ ដោយឥតគិតថ្លៃរយៈ ពេល ២ឆ្នាំ ចាប់ពីថ្ងៃទី២០ ខែសីហា ២០១៧ ដល់ ២០ សីហា ២០១៩។* ចាប់ពីខែមករា ឆ្នាំ២០១៨ ថៅកែរោងចក្រ សហគ្រាស ដែលជាសមាជិករបស់បេឡាជាតិរបបសន្តិសុខសង្គម ត្រូវទទួលរ៉ាប់រងរាល់សេវាគាំពារសុខភាពរបស់កម្មករ និយោជិត។ ការសម្រេចថ្មីនេះ ធ្វើឲ្យកម្មករ និយោជិតចំណេញ ប្រាក់ប្រមាណ ៨,០០០រៀល ទៅ១៣,០០០រៀលក្នុងមួយខែ។

* ចាប់ពីឆ្នាំ២០១៩ កម្មករ និយោជិត មានប្រាក់សោធននិវត្តន៍ដូចមន្រ្តីរាជការ។ ប្រាក់នេះសម្រាប់ជួយដោះស្រាយ ជីវភាពកម្មករ និយោជិត នៅពេលពួកគេចាស់បម្រើការងារលែងកើត។
* កម្មករ និយោជិត មកពីគ្រប់វិស័យទាំងអស់អាចចូលពិនិត្យ និងព្យាបាលជំងឺក្នុងមន្ទីរពេទ្យរដ្ឋដោយឥតគិតថ្លៃ។
* ចាប់ពីឆ្នាំ២០១៨តទៅ រាជរដ្ឋាភិបាល ក៏នឹងឧបត្ថម្ភថវិកាដល់កម្មការិនីនៅពេលពួកគេសម្រាលកូនផងដែរ។ ក្នុងនោះអ្នកសម្រាលកូន១ ទទួលបានប្រាក់ឧបត្ថម្ភ ៤០ម៉ឺនរៀល សម្រាលកូនភ្លោះពីរ ទទួលបានប្រាក់ឧបត្ថម្ភ ៨០ម៉ឺនរៀល ហើយអ្នកសម្រាលបានកូនភ្លោះ៣ ទទួលបានប្រាក់ឧបត្ថម្ភ ១លាន ២០ម៉ឺនរៀល។
* កម្មការិនីមានផ្ទៃពោះ ត្រូវបានសម្រេចឲ្យចេញមុនម៉ោងធ្វើការយ៉ាងតិច ១៥នាទី ហើយនៅពេលសម្រាលត្រូវបាន អនុញ្ញាតឲ្យឈប់សម្រាករយៈពេល៣ខែ ជាមួយអត្រាប្រាក់ខែ ១២០ភាគរយ។ជាការកត់សម្គាល់គ្រប់ជំនួបរបស់សម្តេចតេជោ ហ៊ុន សែន ជាមួយកម្មករ កម្មការិនី ទទួលបានការគោរពស្រឡាញ់ ជាខ្លាំងពីសំណាក់កម្មករ កម្មការិនី ហើយពួកគេ ក៏បានព្យាយាមថតរូបជាមួយសម្តេចតេជោ ហ៊ុន សែន ដើម្បីទុកជា អនុស្សាវរីយ៍។ ក្រុមកម្មករ កម្មការិនី បានហៅដំណើរសម្តេចតេជោ ហ៊ុន សែន ចុះជួបពួកគេដោយផ្ទាល់នេះ គឺជា ការយកចិត្តទុកដាក់ខ្ពស់បំផុតចំពោះការរស់នៅ និងការបម្រើការងាររបស់ពួកគេពីសំណាក់ប្រមុខរាជរដ្ឋាភិបាល កម្ពុជា។ ក្រុមកម្មករ កម្មការិនី បានចាត់ទុកសម្តេចតេជោ ហ៊ុន សែន ជាប្រមុខដឹកនាំប្រទេស ដែលតែងតែផ្សាភ្ជាប់ សុខទុក្ខរបស់ប្រជាពលរដ្ឋជាមួយរូបសម្តេច។ កម្មករ កម្មការិនី មានជំនឿចិត្តថា តាមរយៈដំណើរចុះដោយផ្ទាល់របស់ សម្តេចទៅតាមរោងចក្រ នឹងធ្វើឲ្យវិស័យកាត់ដេរ និងជីវភាពរបស់កម្មករ កម្មការិនីផងដែរ នឹងកាន់តែល្អប្រសើរ៕ប្រភព៖everyday news

មិនធម្មតា ចៅប្រុសកវី គង្គ ប៊ុនឈឿន ហាត់បាន២ខែក្លាយជាកីឡាករឆ្នើមនៅបែលហ្សិក

មិនធម្មតា ចៅប្រុសកវី គង្គ ប៊ុនឈឿន ហាត់បាន២ខែក្លាយជាកីឡាករឆ្នើមនៅបែលហ្សិក

ចៅប្រុសរបស់កវីល្បីឈ្មោះ គង្គ ប៊ុនឈឿន បានក្លាយជាកីឡាករឆ្នើមក្នុងព្រឹត្តិការណ៍ប្រកួតពានរង្វាន់យុវជនក្រោមអាយុក្រោម១០ឆ្នាំមួយនៅក្នុងតំបន់ស្ថិតនៅ Temse ប្រទេសបែលហ្សិកកាលពីចុងសប្តាហ៍កន្លងទៅនេះ។លោកស្រី ប៊ុនឈឿន សូមីរ៉ែន ដែលជាកូនស្រីបង្កើតរបស់លោកតា គង្គ ប៊ុនឈឿនបានឲ្យដឹងថា កូនប្រុសរបស់គាត់ឈ្មោះ Luigi Pallone អាយុ៩ឆ្នាំចូលចិត្តលេងបាល់ទាត់តាំងពីអាយុ៦ឆ្នាំ ប៉ុន្តែពេលនោះគ្មានពេលហ្វឹកហាត់ និងលេងបាល់ទាត់ច្បាស់លាស់ទេ។ ម្យ៉ាងទៀតពេលនោះមិនពេលវេលាឲ្យកូនចូលហាត់បាល់ ប៉ុន្តែទើបតែឆ្នាំ២០១៧នេះលោកស្រីមានពេលឲ្យកូនចូលហ្វឹកហាត់ជាក្រុមយុវជនមួយនៅតំបន់នោះ។លោកស្រី សូមីរ៉ែនបានបន្ថែមថា បន្ទាប់ពីចូលហាត់ជាមួយក្រុមដែលយុវជនខ្លះហ្វឹកហាត់បានពីរបីឆ្នាំហើយ ប៉ុន្តែពេលចូលរួមប្រកួតពានយុវជននៅតំបន់នោះ កូនរបស់គាត់បានជាប់ឈ្មោះជាកីឡាករល្អប្រចាំព្រឹត្តិការណ៍។ លោកស្រីបញ្ជាក់ថា ការប្រកួតពានរង្វាន់នេះមានក្រុមយុវជនមួយចំនួនបានចូលរួមប្រកួត ហើយក្រុមរបស់កូនគាត់បានក្លាយជាជើងឯង ខណៈកូនរបស់គាត់បានក្លាយជាកីឡាករឆ្នើម។កូនស្រីកវីល្បីឈ្មោះម្នាក់នេះប្រាប់ថា គ្រូបង្វឹករបស់ក្រុមបាននិយាយថា កូនរបស់គាត់មានទេពកោសល្យបាល់ទាត់ និងមានចំណងចំណូលលេងបាល់ទាត់ខ្លាំង។ យ៉ាងណា គេទើបចូលហ្វឹកហាត់បានរយៈពេលខ្លី ដូច្នេះត្រូវឲ្យរូបគេព្យាយាមហ្វឹកហាត់ឲ្យបានច្រើនបន្ថែមទៀត។ រាល់ការប្រកួតម្តងៗ Luigi Pallone តែងតែស៊ុតចូលទីជានិច្ច។កុមារា Luigi Pallone ជាកូនទី២របស់លោកស្រី ប៊ុនឈឿន សូមីរ៉ែន និងស្វាមីដែលមានកូន៤នាក់។ កូនច្បងប្រុសអាយុ១៩ឆ្នាំក៏ចូលចិត្តលេងបាល់ទាត់ ខណៈកូនទី៣អាយុ៧ឆ្នាំ និងកូនពៅនៅតូច។ ស្វាមីរបស់អ្នកស្រីឈ្មោះ Pallone Anthonyជាជនជាតិអ៊ីតាលីកាត់បែលហ្សិក៕ ប្រភព៖everyday news

Tuesday, November 7, 2017

តារាប្រុសថៃ Pong Nawat ផ្តាច់ទំនាក់ទំនងជាមួយមិត្តស្រីព្រោះតែ.......

តារាប្រុសថៃ Pong Nawat ផ្តាច់ទំនាក់ទំនងជាមួយមិត្តស្រីព្រោះតែ.......

តារាសម្តែងនិងជាតួឯកប្រុសក្នុងរឿង “អន្លង់ស្នេហ៍អតីតជាតិ”បច្ចុប្បន្នបានធ្លាយដំណឹងមកថារូបលោកនិងមិត្តស្រី របស់លោកដែលជានារីហាយសូស្នាក់ដែលមានឈ្មោះថា Eauy ពេលនេះបានបែកបាក់ស្នេហាជាមួយគ្នាហើយ។ក្នុងនោះតារាប្រុសរូបសង្ហាររូបនេះក៏បានបញ្ជាក់ថាលោកនិងមិត្តស្រីបែកគ្នាដោយសារតែចំណង់ចំណូលចិត្តរបស់ភាគី ទាំងសងខាងមានភាពខុសប្លែកពីគ្នា និងគ្មាននរណាម្នាក់មានកំហុសដែលធ្វើឱ្យមានការបែកបាក់នេះឡើយ។លោកបានបបន្ថែមទៀតថា រាល់អនុស្សាវរីយ៍ល្អៗជាមួយគ្នាកន្លងមកលោកនឹងចាំវាទុក ចំណែកឯចំណុចមិនល្អលោកនឹងបំភ្លេចវាចោលទាំងអស់៕ប្រភព៖everyday news