កម្ពុជា ត្រូវការចំណាយខ្ទង់ ១៥០ លានដុល្លារ សម្រាប់គម្រោងបង្ហោះផ្កាយរណបលើកដំបូងទៅកាន់អវកាស ដែលអាចចាប់ផ្ដើមនៅ ឆ្នាំ ២០២១។ នេះបើតាមការឲ្យដឹងពីមន្ត្រីជាន់ខ្ពស់នៃនិយ័តករទូរគមនាគមន៍កម្ពុជា (TRC) ចុះផ្សាយក្នុងសារព័ត៌មាន Khmertimes។នៅក្នុងសិក្ខាសាលា “ការវាស់ស្ទង់តម្រូវការទីផ្សារសម្រាប់គម្រោងបង្ហោះផ្កាយរណប” ដែលមានការចូលរួមពីអ្នកតំណាងមកពី ក្រសួងប្រៃសនីយ៍និងទូរគមនាគមន៍(MoPT) និងនិយ័តករទូរគមនាគមន៍កម្ពុជា (TRC) កាលពីដើមសប្តាហ៍នេះ បានសង្កត់ធ្ងន់ទៅលើកិច្ចពិភាក្សាលើលទ្ធភាពនៃការបាញ់បង្ហោះផ្កាយរណបលើកដំបូងរបស់ប្រទេសកម្ពុជា។លោក អ៊ឹម វុត្ថា អ្នកនាំពាក្យនិយ័តករទូរគមនាគមន៍កម្ពុជា (TRC) បានថ្លែងថា គម្រោងការបង្ហោះផ្កាយរណបនេះគឺរដ្ឋាភិបាលបានគ្រោងទុកជាយូរយារណាស់មកហើយ។ ការអនុវត្តកិច្ចការនេះ មានការយឺតយ៉ាវដោយសារត្រូវការវិនិយោគច្រើន។លោកបានលើកពីក្រុមហ៊ុន Royal Blue Skies ដែលជាក្រុមហ៊ុនបុត្រសម្ព័ន្ធនៃក្រុមហ៊ុនរ៉ូយ៉ាល់គ្រុប Royal Group និងក្រុមហ៊ុន Great Wall Industry Corporation ដែលមានមូលដ្ឋានមកពីប្រទេសចិន កំពុងសិក្សាលទ្ធភាពដើម្បីអភិវឌ្ឍគម្រោងមួយនេះ។លោកបានលើកឡើងថា ការវិនិយោគអាចចំណាយប្រហែលជា ១៥០ លានដុល្លារ។ លោកបញ្ជាក់ថា ប្រសិនបើអ្វីៗគ្រប់យ៉ាងរៀបរយទៅមុខ កម្ពុជានឹងបាញ់បង្ហោះផ្កាយរណបចូលក្នុងគន្លងអវកាសនៅឆ្នាំ ២០២១ ឬ ២០២២។លោកថា ការអភិវឌ្ឍគម្រោងនេះអាចចំណាយពេលឆាប់ ដោយសារមានដៃគូសហការដូចជា ក្រុមហ៊ុន Great Wall Industry Corporation ដែលធ្លាប់មានបទពិសោធន៍ ក្នុងការធ្វើគម្រោងបាញ់បង្ហោះផ្កាយរណបជាមួយប្រទេសឡាវ កាលពីឆ្នាំ ២០១៥។លោកបញ្ជាក់ថា នៅពេលដែលកម្ពុជាមានផ្កាយរណបប្រើប្រាស់ផ្ទាល់ខ្លួន អាចសបញ្ជាក់ឲ្យឃើញពីស្វ័យភាពលើការអភិវឌ្ឍវិស័យបច្ចេកវិទ្យាទូរគមនាគមន៍ ជាមួយប្រទេសក្នុងតំបន់។
ប្រភព៖everyday news
No comments:
Post a Comment