ការបំពុលបរិស្ថាន រាប់ចាប់ពីខ្យល់កខ្វក់រហូតដល់ទឹកកខ្វក់ កំពុងសម្លាប់មនុស្សជារៀងរាល់ឆ្នាំច្រើនជាងសង្គ្រាមនិងអំពើហិង្សាទាំងអស់នៅក្នុងពិភពលោក។ ហើយវាក៏សម្លាប់មនុស្សច្រើនជាងការជក់បារី ការអត់ឃ្លាន ឬគ្រោះមហន្តរាយធម្មជាតិទៅទៀត។ សូម្បីអេដស៍ របេង និងគ្រុនចាញ់រួមបញ្ចូលគ្នាក៏នៅចាញ់វាដែរ។ យោងតាមការស្រាវជ្រាវមួយចេញផ្សាយកាលពីថ្ងៃព្រហស្បតិ៍ទី១៩តុលានៅក្នុងទស្សនាវដ្តីវេជ្ជសាស្ត្រ The Lancet បានឱ្យដឹងថា ម្នាក់ក្នុងចំណោមមនុស្ស ៦ នាក់ដែលស្លាប់មុនអាយុនៅលើពិភពលោកក្នុងឆ្នាំ ២០១៥ ពោលគឺប្រហែល ៩ លាននាក់ អាចស្លាប់ដោយសារប៉ះពាល់នឹងជាតិពុល។របាយការណ៍នេះបានឱ្យដឹងថា ការចំណាយហិរញ្ញវត្ថុពីការស្លាប់ដោយសារការបំពុល ជំងឺ និង សុខុមាលភាព គឺមានទំហំធំស្មើគ្នា ដោយធ្វើឱ្យខាតបង់ប្រមាណ ៥,៩ លានលានដុល្លារប្រចាំឆ្នាំ ឬប្រហែល ៦,២ ភាគរយនៃសេដ្ឋកិច្ចសកលលោក។ព្រឹទ្ធបុរសនៃសាលាជំនាញសុខភាពពិភពលោកនៅសាលាវេជ្ជសាស្ត្រអ៊ីកាញ់ (Icahn School of Medicine) នៅតំបន់ម៉ោនស៊ីណៃ នៃទីក្រុងញូវយ៉ក និងជាអ្នកនិពន្ធឈានមុខលើរបាយការណ៍នេះ គឺលោក ហ្វីលីព លែនឌ្រីហ្គាន (Philip Landrigan) បាននិយាយថា “មានការសិក្សាច្រើនអំពីការបំពុលប៉ុន្តែវាមិនដែលទទួលបានធនធានឬកម្រិតនៃការយកចិត្តទុកដាក់ដូចជំងឺអេដស៍ឬការប្រែប្រួលអាកាសធាតុទេ”។របាយការណ៍នេះកត់សម្គាល់ពីការប៉ុនប៉ងលើកដំបូងដើម្បីទាញបញ្ចូលទិន្នន័យទាំងអស់រួមគ្នាអំពីជំងឺនិងការស្លាប់ដែលបណ្តាលមកពីគ្រប់រូបភាពនៃការបំពុលបរិស្ថាន។លោក លែនឌ្រីហ្គាន បាននិយាយថា “ការបំពុលគឺជាបញ្ហាដ៏ធំមួយដែលមនុស្សមើលមិនឃើញ ដោយសារតែពួកគេកំពុងសម្លឹងមើលតែផ្នែកមួយនៃភាគល្អិតរបស់វា”៕ ប្រភព៖everyday news
No comments:
Post a Comment